យូរយារណាស់មកហើយ មានបុរសម្នាក់ទៅមើលគេលៀងមេមត់ ក៏បានដើរកាត់ក្បែរដី ទួលកប់ខ្មោចមួយកន្លែងដែលមានព្រៃស៊ុមទ្រុម ស្រាប់តែមានខ្មោចស្រែកហៅគាត់។
ខ្មោច ៖ ពូ ៗ ផ្ដាំទៅប្រាប់ប្រពន្ធឲ្យឆាប់មកវិញផង ។
បុរស៖-(គាត់មិនចេះខ្លាចខ្មោចទេ គាត់ដឹងថាខ្មោចហៅពិតណាស់ ប៉ុន្តែគាត់ធ្វើព្រងើយ) សួរថាហើយប្រពន្ធឯងនៅឯណា ?
ខ្មោច ៖ ប្រពន្ធខ្ញុំ នៅឯផ្ទះគេលៀងអារក្សឯនោះ !
បុរស ៖ ចុះឯង ឲ្យអញប្រាប់នាងយ៉ាងម៉េចបាន ? បើអញមើលប្រពន្ធឯងមិនឃើញនោះ !
ក្នុងពេលនោះខ្មោចក៏ឲ្យប្រទាលប្រហោង គឺជាថ្នាំសម្រាប់មើលខ្មោចឃើញទាំងអស់។ ខ្មោចឲ្យប្រទាលនោះទៅបុរសនោះហើយ ប្រាប់ទាំងឈ្មោះប្រពន្ធផងដើម្បីឲ្យគាត់
បានជួយប្រាប់ឲ្យ។ បុរសនោះ កាលបើបានប្រទាលប្រហោងនោះហើយ មើលឃើញខ្មោចនៅពេញតែព្រៃ តែគាត់មិនតក់ស្លុតនោះទេ គឺ គាត់ចេះតែដើរទៅ ៗ ដោយគ្មានភិតភ័យខ្លាចអ្វីឡើយ។ គាត់ដើរតម្រង់ទៅផ្ទះណាគេលៀងអារក្ស លុះដល់ផ្ទះនោះហើយ គាត់ឃើញខ្មោចស្រីៗ កំពុងស៊ីពែសំណែន ដែលសែននៅពោរពេញ ជាច្រើនគ្នា។ បុរសនោះក៏បានស្រែកហៅទៅតាមឈ្មោះដែលខ្មោចប្រុសបានផ្ដាំមក ហើយបោយដៃហៅចំពីមុខខ្មោចស្រីតែម្ដង។
បុរស៖-ប្ដីហងឲ្យទៅផ្ទះឲ្យឆាប់ ព្រោះកូនយំខ្លាំងណាស់ !
ខ្មោចស្រី៖ (នឹកឆ្ងល់ថា ម៉េចក៏បុរសនោះមើលឃើញអញ ទើបដើរសំដៅទៅ)ចុះអ្នកឯងម៉េចក៏មើលយើងឃើញ ?
បុរស ៖ (បុរសនោះក៏បង្ហាញប្រទាលប្រហោងទៅខ្មោច) នេះជាប្រទាលដែលប្ដីហងឲ្យអញ ទើបបានជាអញឃើញហ្នឹងណា ។
ខ្មោចនោះ គ្រាន់តែឃើញប្រទាលនោះភ្លាម ស្ទុះទៅដណ្ដើមយក ប៉ុន្តែបុរសនោះពុំព្រមឲ្យ ក៏មានការប្រវាយប្រតប់គ្នា ដណ្ដើមប្រទាលប្រហោងនោះ។ បុរសចេះតែស្រែកហៅ
ឲ្យគេឯងជួយ ប៉ុន្តែអ្នកទាំងអស់មើលទៅពុំឃើញប្រយុទ្ធជាមួយនរណាសោះ ឃើញតែស្ទុះស្ទាតែម្នាក់ឯង ម្ល៉ោះហើយគេនាំគ្នាទៅជាស្រឡាំងកាំងរកជួយមិនកើត។ លុះប្រវាយ
ប្រតប់គ្នាអស់មួយសន្ទុះធំ បុរសក៏ចង់រសាយដៃ ក៏របូតប្រទាលនោះពីដៃទៅ។ ខ្មោចស្ទុះប្រុងរើសយក តែពេលនោះ ឆ្កែឃើញភ្លាម ស្ទុះភ្លែតមកត្របាក់លេបចូលទៅក្នុង
ពោះបាត់ទៅ។ ហេតុនេះហើយបានជាឆ្កែមើលខ្មោចឃើញ។
ដោយសារមានរឿងនិទានយ៉ាងនេះ បានជាមានជំនឿថា ឆ្កែវាមើលខ្មោចឃើញ បើឆ្កែព្រុសលូក្នុងពេលយប់ ព្រោះវាឃើញខ្មោចដើរ។ មួយវិញទៀត មានមនុស្សច្រើនណាស់
ដែលនៅជឿជាក់ហើយខំស្វែងរកប្រទាលប្រហោង ដើម្បីយកមកប្រើការសក្ដិសិទ្ធិផ្សេងៗ។